የኢትዮጵያ ዓይነስውራን ብሔራዊ ማኅበር በወሊሶ ከተማ የአየር ንብረት ለውጥና የአደጋ ስጋት ቅነሳ ስልጠና ሰጠ


የካቲት 20/2018 ዓ.ም | ወሊሶ፣ ኢትዮጵያ

የኢትዮጵያ ዓይነስውራን ብሔራዊ ማኅበር፣ በወሊሶ ከተማ ለሚገኙ የማኅበሩ አባላትና ከተለያዩ የአካል ጉዳተኞች ማኅበራት ለተውጣጡ 30 ወንድና ሴት ተሳታፊዎች የአቅም ግንባታ ስልጠና ሰጠ። ይህ ስልጠና ባለፈው መስከረም ወር በተመሳሳይ ርዕሰ ጉዳይ የተጀመረው የግንዛቤ ማስጨበጫ መርሃ-ግብር ተከታይ ክፍል ነው።

ትኩረት በአየር ንብረት ለውጥና የአካል ጉዳተኞች መብት ላይ

ስልጠናው በዋናነት ትኩረት ያደረገባቸው ነጥቦች፡-

* የአየር ንብረት ለውጥ ተጽዕኖ፡ በአለም አቀፍና በሀገር አቀፍ ደረጃ እየታዩ ያሉ የአየር ንብረት ለውጥ ስጋቶችና አደጋዎች።

* ተጋላጭነት፡ የተፈጥሮና ሰው ሰራሽ አደጋዎች በሚከሰቱበት ወቅት በአካል ጉዳተኞች ላይ የሚደርሰው የከፋ ጉዳት።

* የመረጃ ተደራሽነት፡ አደጋዎች ከመድረሳቸው በፊት መረጃዎችን ለአካል ጉዳተኞች ተደራሽ ለማድረግ ያሉ ተግዳሮቶችና የመፍትሄ አቅጣጫዎች።

“የአንድ አካል ጉዳተኛ መብት መጣስ የሁላችንም ነው”

የማኅበሩ የወሊሶ ቅርንጫፍ የኮሚቴ ሰብሳቢ አቶ አበረ ሀብተወልድ ስልጠናውን በእንኳን ደህና መጣችሁ ንግግር የከፈቱ ሲሆን፣ ማኅበሩ ለአካል ጉዳተኞች እየሰጠ ላለው ትኩረት ምስጋና አቅርበዋል። አቶ አበረ አክለውም፦

> “ሰልጣኞች ያገኙትን እውቀት መነሻ በማድረግ መብታቸውን ለማስከበር በጋራ መስራት አለባቸው። የአንድ አካል ጉዳተኛ መብት መጣስ የሁላችንም መብት መጣስ ነው በሚል መርህ በአንድነት መቆም ይገባናል” ሲሉ አሳስበዋል።

>በተጨማሪም ከዋናው መሥሪያ ቤት በመጡ ባለሙያዎች አማካኝነት የማኅበሩ ታሪክ፣ ማንነትና ዋና ዋና ተግባራት ለታዳሚው ቀርቧል።

የህግ ግንዛቤና የተግባር ውይይት

ተሳታፊዎች የተባበሩት መንግስታት ድርጅት የአካል ጉዳተኞች መብት ኮንቬንሽንን (UNCRPD)፣ የኢትዮጵያን ህገ-መንግስትና የአየር ንብረት ለውጥ መመሪያዎችን በሚመለከት ሰፊ ውይይት አድርገዋል። በውይይቱም ወቅት፦

* ከዚህ ቀደም ህግን ባለማወቅ ምክንያት መብታቸው ሲጣስ ዝም ይሉ እንደነበር።

* አሁን ግን በስልጠናው ባገኙት እውቀት መብታቸውን ለማስከበር በቁርጠኝነት እንደሚሰሩ ገልጸዋል።

የቁሳቁስ ድጋፍና ቀጣይነት

በዕለቱ የወሊሶ አካል ጉዳተኞች ልማት ማኅበር ከወሊሶ ፖሊቴክኒክ ኮሌጅ ጋር በመተባበር ያከናወነውን ድጋፍ አበርክቷል። በዚህም መሰረት 15 ክራንችና 10 ነጭ በትሮች ተገኝተው፣ ለኢትዮጵያ ዓይነስውራን ብሔራዊ ማኅበር የወሊሶ ቅርንጫፍ አባላት ርክክብ ተደርጓል።

ይህ ስልጠና በነገው ዕለትም ለቁልፍ አጋር አካላት (Stakeholders) መሰጠቱን የሚቀጥል ይሆናል።


Leave a Reply

Your email address will not be published. Required fields are marked *

Skip to content