የኢትዮጵያ ዓይነስውራን ብሔራዊ ማኅበር (ENAB) ከኢትዮጵያ የሰብዓዊ መብቶች ድርጅቶች ሕብረት (CEHRO) ጋር በመተባበር፣ በአይነ ስውራን የባንክ አገልግሎቶች ተደራሽነት ዙሪያ የተሰራውን የመነሻ ግምገማ (Baseline Assessment) ለማረጋገጥ ያዘጋጀውን የምክክር መድረክ በስኬት አከናወነ።
ይህ ፕሮጀክት በCEHRO የገንዘብ ድጋፍ የሚተገበር ሲሆን፣ ዋና ዓላማው በባንክ አገልግሎት አሰጣጥ ሂደት ውስጥ አይነ ስውራን የሚያጋጥሟቸውን ተግዳሮቶች በመለየት እና ያሉትን እድሎች በመጠቀም አካታች የሆነ የባንክ አሰራር እንዲሰፍን ማድረግ ነው።
የወርክሾፑ ዋና ዓላማዎች
የመድረኩ ተቀዳሚ ዓላማ የጥናቱን ግኝቶች ለባለድርሻ አካላት በማቅረብ፣ ግኝቶቹ የአይነ ስውራንን ተጨባጭ የህይወት ተሞክሮ እና የአካል ጉዳተኞችን መብት በትክክል ያንጸባረቁ መሆናቸውን መገምገም እና ማረጋገጥ ነበር። በዚህም ለፕሮጀክቱ ቀጣይ አቅጣጫ እና ለታቀዱት የአድቮኬሲ ስራዎች ጠንካራ ግብዓት ተሰብስቧል።
የተሳታፊዎች ሚና እና የተነሱ ዋና ዋና ጉዳዮች
በምክክር መድረኩ ላይ የአካል ጉዳተኞች ማኅበራት ተወካዮች፣ የሚዲያ አካላት እና የሕግ ባለሙያዎች ተሳትፈዋል። ተሳታፊዎቹ በጥናቱ ላይ ተመስርተው የሚከተሉትን ወሳኝ ነጥቦች አንስተዋል፡-
- የሕግ ክፍተቶች፡ አካታች የባንክ ስርዓትን ለማስፈን እንቅፋት የሆኑ የሕግ ማዕቀፍ ክፍተቶች በሰፊው ተዳስሰዋል።
- የዲጂታል ተደራሽነት ችግር፡ አብዛኛዎቹ የባንክ ዲጂታል ምርቶችና መተግበሪያዎች ለአይነ ስውራን ተደራሽ አለመሆናቸው (Inaccessibility of Digital Banking) እንደ ትልቅ ማነቆ ተጠቅሷል።
- የግንዛቤ እጥረት፡ የባንክ ሰራተኞች እና አገልግሎት ሰጪዎች ስለ አካል ጉዳተኞች መብት እና ስለ ባንኮች ህጋዊ ግዴታዎች ያላቸው ግንዛቤ ውስን መሆኑ ተብራርቷል።
የወደፊት አቅጣጫ እና የመፍትሔ ሃሳቦች
ተሳታፊዎቹ የባንክ ተደራሽነትን ለማረጋገጥ የተደረጉ የረጅም ጊዜ የውትወታ (Advocacy) ጥረቶችን ያደነቁ ሲሆን፣ በቀጣይ ግን ስራዎቹ በስትራቴጂካዊ የህግ ክርክር (Strategic Litigation) ቢታገዙ ለውጥ ማምጣት እንደሚቻል ምክረ-ሃሳብ አቅርበዋል።
በመጨረሻም፣ የማኅበሩ ተወካዮች እና የጥናቱ አቅራቢዎች ለተነሱት ጥያቄዎች ምላሽ የሰጡ ሲሆን፣ ከባለሙያዎች የተገኙት ግብዓቶች የጥናቱን ጥራት ከማሳደግ ባለፈ ለቀጣይ የውትወታ እና የህግ ስራዎች እንደ ጠንካራ መሰረት እንደሚያገለግሉ ተገልጿል።



Leave a Reply